Dili, 02 Janeiru 2021 – Ministra Saúde Odete Freitas Belo esplika lapsu ka erru ne’ebé akontese iha kuarentena Tasi-tolu iha 31 Dezembru 2020 liubá relasiona ho kazu Covid-19 katak, Ministériu Saúde deteta pasajeiru ho naran João Baptista no idade 26 iha kuarentena Tasi-tolu pozitivu ba Covid-19, maibé médiku sira evakua fali pasajeiru ida ho naran João Marçal Baptista, idade 31, ne’ebé teste negativu ba izola tiha iha Vera-krúz.

Nia haktuir, pasajeiru na’in rua (2) ne’e iha hotu kuarentena Tasi-tolu no fatin kuarentena Tasi-tolu eziste pasajeiru ho naran João hamutuk na’in neen (6).

“Infelizmente evakuasaun hala’o fali ba pasajeiru João Marçal Baptista (ho idade) 31 ne’ebé rezultadu teste negativu,” dehan Ministra Odete liuhosi konferénsia imprensa ne’ebé hala’o iha sábadu (02/01) ne’e iha salaun Palácio das Cinzas Kaikoli, Dili.

Iha loron hanesan (31/01), Ministériu Saúde evakua kedas João Baptista ne’ebé pozitivu Covid-19 hodi ba izola hikas iha Vera-krúz.

Nia kontinua esplika katak presiza halo investigasaun ba lapsu refere hodi bele identifika loloos nia fallansu ne’e iha Ministériu Saúde maibé iha parte ida ne’ebé.