Dili, 06 Janeiru 2021 – Ministra Saúde Odete Freitas Belo informa katak Vasina Covid-19 ne’ebé Timor-Leste atu sosa ne’e wainhira to’o ona mai, sei fó uluk ba ekipa liña oin ka frontline sira ne’ebé iha ligasaun beibeik ho pasiente Covid-19 sira.

“Depois ita haree fali ba pasiente vulnerável sira ezemplu hanesan ema di’ak ka ema sira ne’ebé mak iha moras uitoan ho diabétiku ka Tuberkuloze, ida ne’e ita fó ba sira depois ita haree mós ba iha manorin-na’in sira no funsionáriu sira ne’ebé servisu iha Alfándega no mós Polísia,” Ministra Odete esplika tutan tán, ohin (06/01) iha Palásiu Governu, hafoin partisipa tiha iha reuniaun Konsellu Ministru.

Ministra Odete esplika mós katak Vasina Covid-19 ba Timor-Leste ne’e sei sosa ho apoiu pursentu 20 (20%) hosi nasaun seluk no pursentu 80 (80%) hosi Governu Timor-Leste.