Jakarta, 09 Janeiru 2021 - Aviaun Sriwijaya Boeing 737-500 ho númeru SJ182 ne'ebé semo ba rota Jakarta-Pontianak monu iha área Pulau Seribu nian iha tuku 14.40 Oras Indonézia Oeste, iha Sábadu (09/01). Aviaun ne'e lori ema nain-62 ne'ebé kompostu hosi pasajeiru nain-50 inklui labarik nain-7 no ekipa aviaun nian nain-12.

Tuir informasaun hosi diretór PT Sriwijaya Air, Jefferson Irwin Jauwena liuhosi konferénsia imprensa iha Bandara Soekarno-Hatta iha Sábadu kalan (09-01) hateten katak aviaun refere antes semo konsege demora tiha minutu-30 tanba kondisaun klima mak ladun di'ak no la'os tanba aviaun nia kondisaun.

"Ohin delay ne'e tuir informasaun ne'ebé ha'u hetan hateten katak tanba udan mak bo'ot. [...] aviaun nia kondisaun di'ak hela tanba antes ne'e semo ba-mai hela Jakarta-Pontianak no Pangkalpinang Baru", dehan Jefferson.

Iha momentu ne'ebé hanesan, Xefe Komite Nasional Keselamatan Transportasi (KNKT), Soerjanto Tjahjoni hateten katak ninia parte sei koordena ho Badan Meteorologi, Klimatologi dan Geofisika (BMKG) hodi buka hatene sekarik kondisaun klima iha tempu ne'ebá ne'e mak afeita ba dezastre aviaun refere.