Dili, 12 Janeiru 2021 - Organizasaun Mundiál ba Saúde (OMS) rekomenda atu Timor-Leste sosa no uza vasina Covid-19 ne'ebé prodúz hosi AstraZeneca no Universidade Oxford, tanba apropiadu ho kondisaun Timor-Leste nian, tuir informasaun ne'ebé hato'o hosi Koordenadora Jerál Komisaun Covid-19, Odete da Silva Viegas, liuhosi konferénsia imprensa ne'ebé hala'o ohin (12/01) iha Palácio das Cinzas, Dili.

"Ita iha direitu atu asesu mós ba vasina COVID-19 iha merkadu internasionál [...] Tuir rekomendasaun hosi Organizasaun Mundiál Saúde katak vasina ne’ebé apropriadu atu bele aplika iha Timor-Leste mak AstraZeneca, ho razaun katak vasina ne’e bele rai iha jeleira ho temperatura 2-80C, kondisaun ida ne’ebé mak fasilidade saúde sira iha teritóriu laran tomak iha no uza hodi rai vasina rutina sira seluk," Odete esplika.

Odete akresenta, vasina AstraZeneca/Oxford nia folin baratu, produsaun masál hahú tiha ona, uza mós iha nasaun barak, hetan ona pre-kualifikasaun hosi OMS no EUL.

Tuir planu, Odete dehan, faze dahuluk implementasaun vasina refere sei introdúz ba pursentu 20 hosi populasaun iha Timor-Leste, ne'ebé kompostu hosi traballadór saúde no frontline sira hotu, inklui grupu risku no vulnerável sira. 

Nia dehan tán, Kampaña imunizasaun AstraZeneca/Oxford ne'e provavelmente sei hahú iha fulan Maiu tinan ida ne'e.