Grupu Timoroan Transforma Tasi-Been Ba Bee-Moos Tulun Ona Komunidade 1.000 Iha Likisá

Dili, 12 Janeiru 2021 – Timoroan ne’ebé harii grupu Kooperativa Nurak Sulin Hamutuk hodi prodúz tasi-been ba bee-moos, informa katak sira konsege prodúz ona tasi-been sai bee-moos hodi fornese ba komunidade hamutuk 1.000 iha munisípiu Likisá. Sira prodúz bee galon hamutuk 35 to’o 40 kada loron.

Prezidente Kooperativa Nurak Sulin Hamutuk, Olívio da Cruz Pinto informa ida ne’e, wainhira hasoru malu ho Prezidente Repúblika Francisco Guterres Lú Olo ohin (12/01) iha Palásiu Prezidensiál Ai-tarak Laran, Dili, hodi hato’o mós sira-nia preokupasaun balu ba Estadu.

Grupu ne’e nia esperansa katak ho intervensaun hosi Estadu ka Governu, sira sei kria sistema di'ak liu hodi fornese bee-moos hosi tasi-been ba komunidade iha fatin ne’ebé menus bee.

“Ha'u louva ba atividade ne’ebé juventude sira halo iha Likisá. Ha'u sente orgullu tanba timoroan iha kapasidade halo inovasaun, muda tasi-been ba bee-moos. Ukun rasik-an ita presiza inisiativa sira hanesan ne'e," dehan Prezidente Repúblika.

Prezidente Repúblika mós kompromete katak sei hato’o grupu ne’e nia preokupasaun ba Governu ne’ebé nu’udar Ezekutivu.

Fonte: Mídia Presidente da República (PR)

Notísia Hotu-Hotu >