Dili, 12 Janeiru 2021 – Prezidente Tribunál Rekursu, Deolindo dos Santos informa katak iha partidu haat ne’ebé hatama pedidu inskrisaun ba Tribunál Rekursu iha Dezembru 2020 liubá atu rekoñese legalmente hodi hala’o atividade polítika, maibé partidu Os Verdes no FITUN la priense kritéria, no Partidu Timor Forte (PATIFOR) ho Partidu Dezenvolvimentu Sosiál (PDS) sei hein desizaun hosi Tribunál Rekursu iha tempu badak.

“Iha rua mak iha desizaun ona. Ida mak sai iha semana ida liubá ne’e, ida mak sai horisehik. Desizaun sai ona no notifika partidu rua ne’e ona,” informa Deolindo, ohin (12/01), wainhira hasoru malu ho Prezidente Repúblika Francisco Guterres Lú Olo, iha Palásiu Prezidensiál.

Deolindo rekoñese katak la fásil atu halo verifikasaun ba ema rihun 20 hosi partidu haat iha tempu hanesan. Maske nune’e, iha tempu badak Tribunál Rekursu sei foti tán desizaun ba pedidu inskrisaun hosi PATIFOR no PDS.