Dili, 13 Janeiru 2021 – Koordenadora Jerál Komisaun Nasionál Covid-19, Odete da Silva Viegas, informa katak pasiente Covid-19 na’in ida (1) mak rekuperadu tán ona, maibé iha kazu foun ne’ebé mosu tán fali, kazál timoroan na’in rua (2) pozitivu ba Covid-19, no sira tama mai Timor-Leste liuhosi dalan ilegál iha fronteira terestre.

“Kazál Timoroan na’in rua, ho idade 48 no 39, asimtomatiku. Viájen hosi Jakarta-Kupang, Indonézia, iha loron 21 Dezembru 2020 ho aviaun Garuda Airlines. Iha 22 Dezembru hosi Kupang-Atambua ho kareta aluga. Liutiha semana ida kazál ne’e hosi Atambua mai Timór no deside liu dalan ilegál liuhosi fronteira Badut Mean ho razaun tanba odamatan boot fronteira (POE) Batugede nian taka. Iha loron ne’e kedas seguransa Polísia Unidade Fronteira tula ho kareta hodi ba kumpre kuarentena iha Mota-ain,” informa Odete, ohin (13/01) liuhosi konferénsia imprensa ne’ebé realiza iha Palácio das Cinzas, Dili.

Nia akresenta tán katak kazál na’in rua daudauk ne’e iha ona izolamentu Vera-Kruz, Dili, hodi simu tratamentu.