NT Farmers Iha Austrália Sei Simu Traballadór Timoroan 155 Atu Ba Servisu Iha To’os Pateka

Dili, 14 Janeiru 2021 – Embaixadora Timor-Leste ba Austrália, Inês Maria de Almeida, simu informasaun hosi CEO Asosiasaun Northern Territory (NT) Farmers Paul Burke, ohin (14/01) liuhosi vídiu-konferénsia uza aplikasaun Zoom katak, Governu Norte Australianu aprova ka aseita atu simu traballadór timoroan hamutuk na’in atus ida limanulu resin lima (155) hodi ba servisu iha teritóriu norte, Austrália, iha époka ai-fuan pateka (inglés, melon season).

Informasaun divulgadu hosi mídia Embaixada Timor-Leste iha Austrália haktuir, NT Farmers prevé ona atu hahú simu traballadór timoroan hirak ne’e iha semana oin.

Tanba ne’e, Embaixada sei koordena ho Sekretaria Estadu ba Formasaun Profisionál no Empregu (SEFOPE), Ministériu Negósiu Estranjeiru no Kooperasaun no NT Farmers hodi realiza ida ne’e.

Haktuir informasaun divulgadu ne’e katak, sei haruka traballadór na’in ruanulu (20) iha kada semana hodi ba servisu iha to’os pateka iha teritóriu norte, Austrália, tanba presiza mós halo tuir rekizitu hotu-hotu kona-ba kuarentena hodi prevene Covid-19.

Fonte: Embaixada Timor-Leste Ba Australia

Notísia Hotu-Hotu >