Baukau, 14 Janeiru 2021 – Diretór Eskola Sekundária Santo António (ESSA) Baukau, Padre Angelo Moreira, hateten katak ESSA Baukau hahú ativa atividade letivu no la’os letivu tinan 2021 nian, maibé estudante sira la pratika regra distánsia sosiál hodi evita diseminasaun Covid-19 tanba fatin mak ki’ik ka kloot liu.

Diretór ESSA Baukau informa lia hirak ne’e hafoin ekipa monitorizasaun hosi Provedoria ba Direitu Umanu no Justisa (PDHJ) halo tiha observasaun iha kinta (14/01) ne’e iha eskola refere.

Diretór ne’e esplika katak maske nune’e sira nafatin prepara fasilidade seluk hanesan bee-moos no sabaun ba fase liman no seluk tán.

Nia dehan estudante sira mós simu instrusaun hodi kumpre regra Estadu Emerjénsia (EE) dasiak nian hanesan uza máskara, maibé iha observasaun ekipa PDHJ nota katak estudante balu la uza máskara.