Embaixadora Inês Hasoru Malu Ho NFF Austrália Hodi Ko’alia Kona-ba Traballadór Timoroan

Austrália, 18 Janeiru 2021 – Embaixadora Timor-Leste ba Austrália Inês Maria de Almeida hamutuk ho Primeiru Sekretáriu Samuel Soares, ohin (18/01), hasoru malu ho Diretór Ezekutivu Federasaun Nasionál Agrikultór (sigla inglés NFF) Austrália Tony Maher, no Jestór Jerál ba Relasaun Empregu no Negósiu Legál Ben Rogers, hodi ko’alia kona-ba traballadór timoroan sira ne’ebé prontu ba servisu iha Austrália.

Iha enkontru, Embaixadora Inês informa katak agrikultór sira iha Austrália husu traballadór sazonál timoroan hodi prienxe servisu ne’ebé sira presiza.

Embaixadora mós aprezenta ezemplu susesu iha kooperasaun iha vaga servisu mak timoroan ne’ebé servisu ona iha Tasmania no Northern Territory ne’ebé atu simu tán traballadór. Nia esplika, traballadór timoroan oras ne’e iha 10.000 resin mak prontu atu ba servisu tán iha Austrália.

Iha futuru, Embaixadora Timor-Leste ba Austrália ne’e dehan, hakarak halo kooperasaun di’ak entre Timor-Leste ho NFF Austrália.

Fonte: Embaixada Timor-Leste Ba Australia

Notísia Hotu-Hotu >