Indonézia Hasoru Tán Rai-Nakdoko Ne’ebé Rezulta Ema 50 Resin Mate No Kanek Liu 600

Indonézia, 16 Janeiru 2021: Rai-nakdoko ho magnitude 6.2 akontese iha área provínsia Sulawesi Barat, Indonézia, iha loron rua tuituir malu mak iha kinta (14/01) no akontese maka’as liu iha sexta (15/01) ne’e, hodi rezulta ema hamutuk na’in-50 resin mak mate, tuir dadus ne’ebé informa hosi Badan Nasional Penanggulangan Bencana (BNPB) Indonézia iha sábadu (16/01) ne’e.

Dezastre rai-nakdoko iha Sulawesi Barat ne’e rezulta mós ema hamutuk na’in-630 resin mak hetan kanek, na’in-189 mak hetan kanek todan liu, inklui uma atus resin mak hetan estragus todan liu.

To’o oras ne’e, PNPB servisu hamutuk ho forsa sira hodi halo nafatin evakuasaun ba vítima sira hosi dezastre refere.

Xefe BNPB Raditya jati husu atu populasaun sira tenke fiar informasaun kredível sira no labele fiar informasaun HOAX  sira kona-ba dezastre naturál iha Indonézia.

“Populasaun labele fiar notísia falsu ka HOAX kona-ba prediksaun ka ramalan rai-nakdoko ne’ebé dehan katak sei akontese ho forsa boot liután no sei mosu tsunami,” dehan Raditya.

Fonte: Kompas Indonesia

Notísia Hotu-Hotu >