Vatikanu, 17 Janeiru 2021 – Líder igreja Katólika Roma Papa Francisco, hato’o nia orasaun ba vítima asidente aviaun Sriwijaya Air ne’ebé monu iha 09 Janeiru liubá iha Indonézia hodi hamate ema na’in-62, no ba mós vítima hosi dezastre rai-nakdoko ne’ebé akontese mós iha Indonézia iha 15 Janeiru liubá hodi hamate ema liu na’in-50 no hakanek ema atus resin.

“Maun-alin sira ne’ebé ha’u hadomi, mai ita harohan ba ita-nia maun-alin sira iha Sulawesi (Indonézia) ne’ebé enfrenta rai-nakdoko no mate, kanek inklui lakon sira-nia uma no servisu, no mós ba vítima sira asidente aviaun ne’ebé akontese iha sábadu liubá iha Indonézia,” Papa Francisco temi iha orasaun Angelo iha domingu (17/01) ne’e iha Palásiu Apostóliku, Vatikanu.