Manufahi, 18 Janeiru 2021 – Administradór Munisípiu Manufahi Arantes Isaac Sarmento informa ohin (18/01) iha nia knaar-fatin katak, nia lamenta tebes ho informasaun kona-ba ema deskoñesidu ne’ebé lori kilat boot ba halo atividade kasa ilegál hodi tiru mate tiha komunidade sira-nia karau hakiak tolu.

Nia esplika, kasa ilegál ne’ebé akontese iha kinta (14/01) kalan iha suku Dotik postu-administrativu Alas ne’e tenke loke prosesu investigasaun, tanba iha Alas estabelese ona lei kulturál tara-bandu kona-ba kasa animál fuik ka hakiak.

Komandante Komandu Polísia Manufahi Superintendente Polísia Joni Viana das Regras informa mós iha segunda (18/01) ne’e katak, Polísia to’o tiha ona iha fatin akontesementu hodi justifika loloos kazu ne’e, maibé kazu refere la submete ba prosesu investigasaun tanba komunidade seidauk hato’o keixa ba Polísia.

Komunidade sira haktuir kronolojia katak, kazu refere akontese iha kinta (14/01) kalan, ema deskoñesidu tiru mate karau hakiak tolu, sira tula tiha rua ba kareta hodi ba no ida sira husik hela iha rai.