Dili, 18 Janeiru 2021 – Ministru Obras Públikas (MOP) Salvador dos Reis Pires informa katak, Diresaun Jerál Obras Públikas fó ona tempu ba komunidade afetadu hosi konstrusaun estrada hahú hosi Rotunda Prezidente Nicolau Lobato to’o Tasi Tolu ne’ebé hetan ona indiminizasaun atu halo evakuasaun hodi hamamuk estrada refere, atu bele hahú prosesu konstrusaun.

“See la sala, ami-nia Diresaun Jerál Obras Públikas fó ona tempu, períodu balu ba sira para sira prepara atu sai tuir tempu ne’ebé sira tenke kumpre, ha’u fiar katak ita-nia komunidade sira sei kumpre tempu ne’ebé mak fó sai para sira bele evakua hosi fatin ne’e, husik hela espasu ba prosesu instalasaun ba estrada ne’e rasik,”MOP informa iha segunda (18/01) ne’e, hafoin remata enkontru ho Primeiru Ministru Taur Matan Ruak, iha Palásiu Governu, Dili.

Ministru ne’e akresenta liután, iha 7 Dezembru 2020 liubá Konsellu Administrasaun Fundu Infraestrutura (KAFI) halo desizaun atu utiliza poupansa Loan ne’ebé iha hodi finansia projetu refere no hahú realiza iha tinan ida ne’e, maibé sei hein prosesu evakasaun hodi komunidade sira.