Membru PN La Kontribui Ba Saúde Públiku Tanba Retira Tiha Proposta Hasa'e Tabaku Nia Folin

Dili, 19 Janeiru 2021 - Jestór Aliansa Nasionál Kontrolu Tabaku iha Timor-Leste (sigla portugés ANCT-TL) Sancho Fernandes hateten, membru Parlamentu Nasionál (PN) la kontribui ba saúde públiku tanba sira retira tiha proposta ne'ebé ANCT-TL hatama kona-ba atu hasa'e tabaku nia folin iha Timor-Leste. Jestór ANCT-TL hato'o lia hirak ne'e ba jornalista Timor News nian, ohin (19/01) iha nia knaar-fatin Mandarin, Dili.

Jestór ANCT-TL esplika katak iha 12 Dezembru 2020 Governu ho PN diskute duni kona-ba proposta refere ho pozitivu, maibé Bankada FRETILIN iha PN mak retira tiha proposta ne'e sein konkluzaun ruma, no ida ne'e hatudu katak membru PN sira la kontribui ba saúde públiku. 

"Iha diskusaun, rezultadu seidauk konklui, ami haree katak proposta ne'e retira tiha hosi proponente ne'e rasik mak partidu FRETILIN. [...] Ami haree katak ida ne'e hanesan ladún hatudu vontade di'ak tanba retira fali proposta hasa'e taxa (tabaku) ne'e [...] Desizaun ne'ebé foti hosi membru PN ne'e la kontribui ba saúde públiku," dehan Sancho ba Jornalista Timor News.

ANCT-TL konsidera mós katak desizaun hosi membru PN hodi retira proposta hasa'e tabaku nia folin ne'e fó impaktu negativu boot ba joven sira-nia saúde no ekonomia.

Fonte: Timor News

Notísia Hotu-Hotu >