Dili, 20 Janeiru 2021 – Xefe Estadu Maiór Jenerál Lere Anan Timur informa katak rekrutamentu ba membru foun FALINTIL – Forsa Defeza Timor-Leste (F-FDTL) sei hala’o iha fulan Marsu no Abril tinan 2021 ne’e tanba kestaun preparasaun lojístika.

Jenerál Lere hato’o informasaun refere ba Prezidente Repúblika Francisco Guterres Lú Olo ohin (20/01), wainhira hasoru malu iha Palásiu Prezidensiál hodi relata progresu servisu instituisaun F-FDTL nian inklui seguransa iha fronteira.

Tanba ne’e, Jenerál Lere husu ba Governu atu prepara ho lalais liután kondisaun ba rekrutamentu membru foun F-FDTL.

Haktuir hikas informasaun ne’ebé Timor News divulga iha fulan Agostu tinan 2020 liubá katak, Ministru Defeza Filomeno Paixão dehan sei rekruta membru foun F-FDTL hamutuk 600 iha tinan 2021 no ida ne’e nu’udar prioridade ida Ministériu Defeza nian.