Dili, 20 Janeiru 2021 – Prezidente Parlamentu Nasionál (PPN) Aniceto Guterres Lopes afirma katak, Parlamentu Nasionál tenke halo revizaun ba Lei Eleitorál tuir situasaun atuál ne’ebé Timor-Leste enfrenta liuliu relasiona ho pandemia Covid-19.

“Klaru katak tenke halo revizaun. Satán agora ita taka máskara hanesan ne’e. Máskara bele lori tama ba urna, sentru votasaun ka lae? Ne’e mós presiza regula ho Lei. Ne’e hanesan ezemplu ki’ik oan ida de’it. […] Ita-nia Lei mós tenke adapta ho situasaun foun sira ne’e. Tanba ne’e presiza halo revizaun,” dehan PPN hafoin hasoru malu ho Prezidente Repúblika Francisco Guterres Lú Olo ohin (20/01) iha Palásiu Prezidensiál, Dili.

Iha enkontru, Prezidente Repúblika mós husu atu Parlamentu Nasionál tenke prioritiza Lei sira ne’ebé importante hodi halo ona revizaun hanesan Lei Eleitorál, tanba iha tinan 2022 tama ona ba eleisaun prezidensiál.