Dili, 21 Janeiru 2021: Primeiru-Ministru Timor-Leste Taur Matan Ruak afirma katak, nia la ta’uk no prontu sai nu’udar ema dahuluk iha Timor-Leste hodi simu vasina Covid-19.

Taur hato’o afirmasaun ne’e ohin (21/01) hafoin hasoru malu ho Prezidente Repúblika Francisco Guterres Lú Olo iha Palásiu Prezidensiál, Dili, hodi responde ba jornalista sira-nia pergunta kona-ba nia prontidaun atu sai ema dahuluk hodi simu vasina kontra Covid-19 wainhira realiza iha Maiu 2021.

“Problema la’os prontu, problema sé mak lakohi mate ne’e tenke simu vasina, hakarak mate la simu laiha buat ida, sé mak la hatene moris di’ak liu mate entaun sé ha’u hakarak moris entaun ha’u tenke hetan vasina, entaun ema hotu-hotu ne’ebé hakarak moris, vasina iha simu […] ha’u prontu simu vasina, ha’u la ta’uk, alias ne’e la iha dalan seluk”, dehan Taur.