HASATIL Husu Governu Separa Lixu Orgániku No La Orgániku Molok Lori Ba Tibar

Dili, 20 Janeiru 2021 – Koordenadór Jerál Rede Hametin Agrikultura Sustentável Timor Lorosa’e (HASATIL), Gil Horacio Boavida, husu ba Governu atu kria fatin akomodasaun hodi separa lixu orgániku no la orgániku nune’e labele lori hotu lixu sira ba Tibar tanba hosi lixu ne’e bele resikla sai fali sasán báziku balu hanesan vazu ai-funan, karpet, raga no adubu.

“Governu presiza kria tempat pembuangan sementara tuir tipu lixu nune’e labele lori hotu lixu sira ba iha Tibar tanba hosi lixu ne’e balu bele resikla sai fali produtu ne’ebé bele uza atu nune’e ita labele depende de’it buat hotu ba loja Xina nian,” Gil haktuir ohin (20/01) iha nia knaar-fatin Motaél, Dili.

Nia akresenta, labele fó de’it oportunidade ba xineza sira hodi fa’an sasán báziku sira maibé timoroan mós iha kbiit hodi prodúz sasán báziku sira utiliza lixu.

Gil mós husu ba komunidade sira atu halibur lixu ho di’ak hodi kontribui ba prosesu resiklajen.

Fonte: Timor News

Notísia Hotu-Hotu >