Dili, 22 Janeiru 2021 - VIII Governu ne'ebé lidera hosi Taur Matan Ruak nu'udar Primeiru-Ministru, halo retiru ba daneen ohin (22/01) iha auditóriu Ministériu Finansa Dili, ho tema 'Tinan 2021: Inísiu ba Rekuperasaun Ekonómika ho Transformasaun'.

Iha retiru ne'e hahú loke ho intervensaun Primeiru-Ministru nian ne'ebé dehan, retiru ne'e realiza iha ámbitu ba preparasaun implementasaun Orsamentu Jerál Estadu (OJE) ba tinan 2021 nu'udar tinan ne'ebé Governu pretende marka inísiu ba rekuperasaun ekonómika iha Timor-Leste.

Ministru Finansa Rui Gomes mós iha okaziaun ne'e aprezenta planu rekuperasaun ekonómika ne'ebé kompostu hosi medida 71 ho prazu badak no médiu, ne'ebé VIII Governu atu implementa to'o 2023, no sei foka liu ba área prinsipál ualu (8) mak agrikultura, indústria no turizmu, setór ekonómiku, habitasaun, edukasaun, saúde no protesaun sosiál.