Covid-19: Rekuperadu Foun 3 Maibé Mosu Fali Kazu Pozitivu Foun 11 Mai Hosi Indonézia

Dili, 23 Janeiru 2021 – Koordenadora Jerál Komisaun Covid-19 Odete da Silva Viegas informa ba públiku ohin (23/01) iha Palácio das Cinzas Dili katak, pasiente Covid-19 iha Timor-Leste rekuperadu foun tolu (3) tán maibé mosu fali kazu pozitivu foun 11 ne’ebé mai hosi Indonézia.

“Komisaun Nasionál rejista tán kazu foun Covid-19 hamutuk na’in-11 kompostu hosi feto na’in hitu (7) no mane na’in (4), sira ne’e hotu asintomátiku ka laiha sintoma. Kazu konfirmadu hirak ne’e hosi sidadaun estranjeiru na’in rua (2) no timoroan na’in sia (9). […] Atu esplika klaru katak sira hotu mai hosi nasaun viziñu Indonézia hosi provínsia ne'ebé la hanesan, maioria sira hela iha Atambua,” Odete informa.

Nia esplika, pasiente Covid-19 foun hirak ne’e parte saúde izola ona iha Vera-krúz, no hosi 11 ne’e ida ne’ebé idade boot liu mak 64 no ki’ik liu mak 22.

Nune’e, atualmente pasiente Covid-19 iha Timor-Leste ne’ebé baixa hela hamutuk na’in-14 no komulativu rekuperadu hamutuk na’in-50.

Fonte: Mídia Palácio das Cinzas

Notísia Hotu-Hotu >