Militár Iha Myanmar Halo ‘Golpe de Estado’ Hodi Kaer Podér Durante Tinan Ida

Myanmar, 01 Fevereiru 2021 – Militár iha Myanmar halo ‘Golpe de Estado’ iha nasaun refere hodi kaptura tiha Prezidente Myanmar Win Myint no Líder de-faktu Aung San Suu Kyi, no anunsia iha segunda (01/02) ne’e katak Militár mak sei kaer podér iha nasaun refere durante tinan ida (1).

Golpe de Estado ne’e akontese relasiona ho vitória ne’ebé Aung San Suu Kuy nia partidu Liga Nasionál Demokrasia (sigla inglés NLD) hetan iha eleisaun ne’ebé hala’o iha Novembru 2020 liubá iha Myanmar.

Parte Militár konsidera katak vitória maioria ne’ebé partidu NLD hetan ne’e la justu no iha votu inventadu millaun 10 resin.

Ho ida ne’e mak antes ne’e Jenerál Seniór Min Aung Hlaing nu’udar Komandante Militár Myanmar, ameasa ona atu hamosu Golpe de Estado iha nasaun refere.

Ikus mai Militár kaptura duni Líder hirak ne’ebé temi ona hodi anunsia Estadu Emerjénsia no sira temi katak sei kaer podér durante tinan 1, no Eiz Jenerál Militár Myanmar Myint Swe mak sei kaer fali pasta Prezidente.

Fonte: CNN Indonesia

Notísia Hotu-Hotu >