Joe Biden Ameasa Atu Hatún Pena Ba Myanmar Tanba Militár Halo ‘Golpe de Estado’

Dili, 02 Fevereiru 2021 – Prezidente Estadus Unidus Amérika (EUA) Joe Biden ameasa atu hatún pena ba Myanmar tanba militár iha nasaun refere halo ‘Golpe de Estado’ hodi deklara iha segunda (01/02) ne'e katak militár mak kaer fali podér, haktuir BBC News iha tersa (02/02) ne’e.

Militár Myanmar kaptura Laureada Nobel Páz 1991 Aung San Suu Kyi, no líder sivíl seluk tán, tanba parte militár konsidera katak vitória maioria ne’ebé Aung San Suu Kyi nia partidu Liga Nasionál ba Demokrasia (sigla inglés, NLD) hetan iha elesaun jerál ne’ebé hala’o iha Novembru 2020 liubá ne’e la justu.

Iha komunikadu ida, Joe Biden hateten, “labele husik de’it violénsia atu anula povu nia vontade ka atu hamoos rezultadu eleisaun ne’ebé kredível [...] Estadus Unidus Amérika sei defende demokrasia iha ne’ebé de’it wainhira demokrasia hetan atake”.

Biden hateten, kapturasaun ba líder de facto Myanmar Aung San Suu Kyi no lideransa sivíl sira seluk ne’e nu’udar “atake direita ba demokrasia no Estado de Direito".

Fonte: BBC News

Notísia Hotu-Hotu >