Identifika Tán Ona Pasiente Positivu Covid-19 Nain-1 Ne'ebé Tama Hosi Dalan Ilegál

Dili, 13 Fevereiru 2021 – Komisaun Nasionál Covid-19 Timor-Leste ohin (13/2) rejista tán sidadaun feto ida ho idade 28 pozitivu ba Covid-19, nia tama liuhosi dalan ilegál iha fronteira terestre entre Timor-Leste no Indonézia, no nia mós aluga motorizada ojek ida hosi Maliana atu tama liu ba Dili maibé Unidade Polísia Fronteira (UPF) pasa revista iha Batugadé no identifika tiha sidadaun ne’e.

“Iha 28 Janeiru 2021 timoroan ne’e ho nia oan feto ki’ik tinan 1 fulan 7, sira na’in-2 viájen hosi Atambua, Indonézia mai Timór, deside liuhosi dalan ilegál ka klandestina iha área Memo nian Munisípiu Bobonaru. To’o iha Maliana Inan ne’e konsege aluga motór ojek hodi lori sira na’in-2 atu mai liu Dili. Wainhira sira to’o iha Kuartél UPF Batugadé nian, hetan liuhosi pasa revista hosi ajente UPF no identifika katak sidadaun ne’e tama klandestinamente. Iha biban ne’e kedas UPF lori inan ho oan ne’e ba iha Kuarentena Batugadé,” Koordenadora Jerál Komisaun Nasionál Covid-19 Odete da Silva Viegas informa ohin iha Palácio das Cinzas, Dili.

Odete esplika, kona-ba ojek nia na’in, ekipa halo ona investigasaun maibé pasiente feto ne’e dehan nia la koñese.

Ho nune’e, pasiente pozitivu ba Covid-19 ne’ebé ativu hela iha Timor-Leste sa’e tán ba na’in-39 ona.

Fonte: Mídia Palácio das Cinzas

Notísia Hotu-Hotu >