OMS: Vasina Di’ak Liu Ba Kontestu Timor-Leste Mak Vasina ‘AstraZeneca’

Dili, 15 Fevereiru 2021 - Konsellu Ministrus iha sorumutuk estraordináriu iha Palásiu Governu, Dili, aprova ona projetu Rezolusaun Governu nian kona-ba planu nasionál vasinasaun kontra COVID-19 nian. Planu ne’ebé agora aprova ona ne’e, prevee tuir rekomendasaun OMS nian ne’ebé hateten katak vasina di’ak liu ba kontestu Timor-Leste maka vasina “AstraZeneca”.

OMS konsidera vasina AstraZeneca nu’udar opsaun di’ak liu ba Timor-Leste tanba vasina ne'e segura no efikaz, no mós katak kondisaun nesesáriu sira armazenamentu no refrijerasaun, entre grau rua sentígradu no grau sentígradu ualu, ne’ebé eziste iha país no hanesan ho vasina seluk ne’ebé uza iha programa vasinasaun nasionál sira seluk.

Projetu Rezolusaun Governu nian ne’e aprezenta hosi Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos no hosi Komisaun Interministeriál ba Elaborasaun no Koordenasaun Ezekusaun Planu Vasinasaun kontra COVID-19 nian ho partisipasaun Arvind Mathur, ne’ebé responsavel ba Organizasaun Mundiál Saúde (OMS) iha Timor-Leste.

Fonte: Mídia Gabinete do Primeiro Ministro (GPM)

Notísia Hotu-Hotu >