AMRT Sei Konstrui Jardín Nino Konis Santana Iha Foho Loelaku

Dili, 16 Fevereiru 2021 - Arkivu no Muzéu Rezisténsia Timorense (AMRT) sei konstrui jardín Saudozu Komandante FALINTIL Nino Konis Santana nian iha foho Loelaku ne'ebé lokalizada iha Kailaku, Bobonaru, hola parte ba rejiaun IV.

Diretór Jestaun no Administrasaun AMRT Abrão Marino dos Santos esplika, jardín refere AMRT diskute ona ho veteranu sira, no Governu mós konsidera ona nia orsamentu ne'ebé dehan ho montante millaun 15.

"Graça de Deus iha livru três Governu nian ne'e konsideradu nia orsamentu. Agora ami tenke haree nia dokumentu sira ne'e ami tenke ajusta didi'ak atu bele tama ba prosesu ida naran tenderizasaun internasionál. Ita atu loke ba iha empreza ida ne'ebé iha kapasidade ida ne'ebé bele halo duni jardín Loilaku ne'e. Sé la sala nia orsamentu ne'e millaun 15 ba mós nia estrada," Diretór Abrão informa ba Jornalista Timor News, ohin (16/2), iha nia knaar-fatin AMRT, Dili.

Nia dehan katak tenderizasaun ba projetu konstrusaun jardín Konis Santana iha Loilaku ne'e sei loke iha tinan ida ne'e.

"Ida ne'e hanesan alargamentu AMRT nian primeira véz iha Kailaku. Ne'e la'os atu taka dalan dehan ida de'it. Aban bainrua ami sei haree fali ba fatin ka munisípiu seluk tán. Buat ne'e ita halo ida-ida. Buat ne'e nia prosedimentu no dokumentu ne'e la'os halimar [...] rezisténsia ne'e tenke haburas para ba futuru jerasaun ida ne'e bele koñese didi'ak timor ne'e iha nia istória," Abrão akresenta.

Fonte: Timor News

Notísia Hotu-Hotu >