SEII Husu Atu Labele Halo No Fahe Tutan Vídiu Sira Ne’ebé Hamoe Feto Sira

Dili, 16 Fevereiru 2021 – Sekretaria Estadu ba Igualdade no Inkluzaun (SEII) lamenta tebes ho ema ne’ebé halo vídiu ida virál iha mídia sosiál iha 14 Fevereiru liubá ne’ebé hatudu aktu sexuál hodi hatún feto ida nia dignidade, tanba ne’e SEII husu atu labele halo no fahe tutan vídiu sira ne’ebé hamoe ka hatún dignidade feto sira nian.

Haktuir informasaun divulgadu hosi mídia SEII ohin (16/2) katak atitude halo vídiu ka imajen no fahe tutan hodi estraga feto ne’ebé hetan ona violénsia sira-nia dignidade ne’e kontra konstituisaun RDTL artigu 18 ne’ebé dehan ‘labarik sira iha direitu ba protesaun espesiál hosi família, komunidade, no mós Etadu, liuliu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no esplorasaun’.

Tanba ne’e SEII husu ba sidadaun hotu-hotu katak, wainhira hetan vídiu ruma nune’e, tenke informa ba parte relevante sira ne’ebé bele halo investigasaun hodi asegura vítima atu hetan asisténsia ba protesaun sira nesesária no asesu ba justisa.

“Tamba ne’e ita hotu tenke foti asaun sira hodi proteje ema sidadaun feto no mane hotu, la’os halo feto mak sai objetu ba iha publikasaun iha mídia sosiál hodi halo feto sai vítima ba beibeik,” hakerek iha divulgasaun hosi SEII ne’e.

Fonte: Mídia Secretário de Estado da Igualidade e a Inclusão (SEII)

Notísia Hotu-Hotu >