Reitór Foun UNTL Sei La Permite Kareta UNTL Nian Tula Estudante Enjeñaria Ba Hera Loro-Loron

Dili, 16 Fevereiru 2021 – Diretora Nasionál Lojístika no Manutensaun Universidade Nasionál Timor Lorosa’e (UNTL) Fátima Monteiro hateten, Reitór foun UNTL João Soares Martins iha nia mandatu, sei la autoriza kareta operasionál UNTL nian atu tula ka lalin estudante Fakuldade Enjeñaria, Siénsia no Teknolojia (FEST) loro-loron hodi ba hala’o estudu iha kampus FEST-UNTL Hera ka hodi fila mai Dili.

Nia esplika katak kona-ba kareta operasionál ne’e parte Lojístika no Manutensaun halo tuir de’it desizaun hosi superiór sira UNTL nian.

“Ami bazeia de’it ba desizaun hosi universidade [...] Reitór foun hateten foin daudauk iha Hera dehan sei la sosa bis (autokaru), kareta la tula estudante,” Diretora Fátima dehan ba Jornalista Timor News, iha tersa (16/2) ne’e iha kampus UNTL Kaikoli, Dili.

Enkuantu iha semana kotuk Reitór foun UNTL hateten duni katak nia sei la permite kareta operasionál UNTL atu lalin estudante FEST-UNTL loro-loron Hera-Dili ka Dili-Hera tanba sei estraga de’it osan.

“Enjeñaria Hera sé lakohi selu transporte entaun lalika hili kursu enjeñaria. [...] desizaun ida ne’e (hapara kareta ba FEST-UNTL) di’ak tanba selae ita tenke hasai osan de’it para sosa kombutível, sosa kareta,” dehan Reitór João iha kampus FEST-UNTL, Hera, wainhira sai nu’udar oradór ba programa ida ne’ebé TVE realiza iha semana kotuk.

Fonte: Timor News

Notísia Hotu-Hotu >