Tenke Prienxe Rekizitu Haat Atu Hetan Uma Kbiit-Laek Hosi Governu Timor-Leste

Dili, 18 Fevereiru 2021 – Família ne’ebé atu hetan ka sai benefisiáriu ba uma kbiit-laek ne’ebé Governu Timor-Leste atu konstrui, sei haree ba família ne’e ninia kondisaun uma atuál, kondisaun sosiál liuliu fíziku, kondisaun ekonomia no estatutu rai ne’ebé família ne’e hela ba, no hirak ne’e mak sai nu’udar rekizitu haat (4) ne’ebé família ida tenke prienxe, tuir informasaun ne’ebé Diretora Sekretariadu Tékniku Programa Nasionál Dezenvolvimentu Suku (ST-PNDS) Nasionál Claudina Pinto hato’o.

Kona-ba rekizitu estatutu rai, Diretora ST-PNDS Nasionál ne’e esplika, família labele iha problema ruma kona-ba rai ne’ebé Governu atu harii uma ba.

“Sira tenke hela iha rai ne’ebé mak la’os rai konflitu. Sira nia rai rasik duni, la tama iha planu Governu nian, la’os rai abandonadu. Sira tenke prienxe rekizitu haat ne’e mak foin sira bele elizível ba iha uma kbiit-laek ne’e rasik,” Diretora Claudina informa iha kinta (18/2) ne’e ba jornalista Timor News, iha nia knaar-fatin Kolmera, Dili.

Nia akresenta, PNDS estabele ona ekipa atu bele halo verifikasaun ba lista kandidatu benefisiáriu uma kbiit-laek ne’ebé aprezenta hosi autoridade aldeia no suku sira.

Fonte: Timor News

Notísia Hotu-Hotu >