Governu Apoia Millaun $15 Nu'udar Subvensaun Anuál 2021 Ba Igreja Katólika Lokál Iha Timor-Leste

Dili, 19 Fevereiru 2021 - Governu liuhosi Primeiru-Ministru Taur Matan Ruak ho Konferénsia Episkopál Timorense ne'ebé reprezenta hosi Arsebispu Metropolitan Dili, Dom Virgílio do Carmo da Silva, iha sexta (19/2) iha Palásiu Governu, Dili, selebra asinatura akordu subvensaun anuál 2021 nian hodi fó apoiu millaun $15 ba Igreja Katólika lokál iha Timor-Leste atu jere ba atividade sosiál, edukativu no umanidade nian, tuir Konkordata entre Governu Timor-Leste ho Santa Sé ne'ebé hala'o tiha ona iha loron 14 Agostu 2015.

"Onra boot dala ida tán asina akordu ho Reverendísimu Dom Virgílio do Carmo kona-ba subvensaun ne'ebé tinan-tinan Governu dispoin tuir akordu Kondordata ba iha Konferénsia Episkopál," dehan Primeiru-Ministru hafoin asina tiha akordu ne'e.

Subvensaun millaun $15 refere, 50% sei ba área edukasaun, 25% ba servisu sosiál, 15% ba Governu Ekleziástika no 10% ba jestaun administrativa nian. 

Reprezentante Vatikanu la partisipa iha serimónia asinatura ne'e hodi sai nu'udar testamuña tanba kumpre hela kuarentena hafoin fila hosi vizita ida ba Malázia.

Fonte: Mídia Gabinete do Primeiro Ministro (GPM)

Notísia Hotu-Hotu >