Governu Fahe Postu-Administrativu Hatulia Sai 2: Hatulia A No Hatulia B

Dili, 19 Fevereiru 2021 - Konsellu Ministru halo aprovasaun ba Proposta Lei kona-ba divizaun administrativa teritóriu hodi fahe Hatulia, Ermera, ba postu-administrativu rua (2) mak Hatulia A no Hatulia B.

Proposta Lei refere aprezenta hosi Ministru Administrasaun Estatál (MAE) Miguel Pereira iha reuniaun Konsellu Ministru ne'ebé realiza ohin (19/2) iha Palásiu Governu.

"Proposta Lei ne'e atu harii tán postu ida iha Hatulia. Sei fahe ba rua, Hatulia A no Hatulia B," Ministru Prezidénsia Konsellu Ministru Fidelis Magalhães informa ba imprensa, hafoin remata reuniaun Konsellu Ministru.

Maibé, nia esplika katak proposta ne'e sei haruka hikas ba Parlamentu Nasionál atu diskute hodi foti desizaun finál.

MAE aprezenta Proposta Lei ne'e tanba molok ne'e nia hetan aspirasaun hosi komunidade sira iha Hatulia katak atu fahe Hatulia ba postu-administrativu rua (2).

Fonte: Ministério Presidénsia do Conselho Ministro

Notísia Hotu-Hotu >