Komunidade Afetadu Hosi Konstrusaun Estrada Rotunda-Tasi Tolu Prontu Evakua Ba Fatin Seluk

Dili, 22 Fevereiru 2021 – Komunidade afetadu 100 resin hosi projetu konstrusaun Estrada protokolu hahú hosi rotunda Prezidente Nicolau Lobato to’o Tasi-Tolu hateten katak, sira prontu atu hamamuk fatin no evakua hikas ba fatin seluk hodi kontribui ba dezenvolvimentu nasionál.

Maximiano Ximenes Gama nu’udar reprezentante ida hosi komunidade afetadu hosi projetu refere hateten, Governu mós fó ona kompensasaun ba komunidade afetadu sira no karik sei falta ida ka rua de’it mak seidauk hetan kompensasaun, maibé sira hotu-hotu prontu ona no hein hela notifikasaun atu husik fatin ne’e nune’e Governu bele hala’o nia projetu.

“Uma-kain balu hetan ona kompensasaun no karik ida ka rua mak seidauk hetan. [...] Komunidade hotu-hotu aseita no prontu atu sai iha kualkér situasaun [...] Molok atu sai, sira mós tenke halo karta notifikasaun katak komunidade bele sees ona hosi fatin ne’e,” Maximiano informa ba jornalista Timor News iha sábadu (20/2) ne’e iha Terra Santa, Dili.

Parte Ministériu Obras Públikas molok ne’e esplika katak, projetu haluan estrada hosi rotunda to’o Tasi-Tolu ne’e hamutuk ho pakote estrada trosu Tasi-Tolu to’o Tibar ho kustu millaun $12 resin, no nia benefísiu mak, sei fasilita no hasa’e mobilidade ema no sasán, liuliu relasiona ho operasionalizasaun Portu Baia Tibar iha futuru.

Fonte: Timor News

Notísia Hotu-Hotu >