Kada Tinan Timor-Leste Lakon Floresta Kuaze Éktare 10.000

Dili, 22 Fevereiru 2021 – Ministru Agrikultura no Peska (MAP) Pedro dos Reis hateten katak kada tinan Timor-Leste lakon floresta kuaze éktare rihun sanulu (10.000), nune’e fó ameasa boot ba Timor-Leste iha tinan 10 ka 20 mai tán, posivelmente rai sei molik ka mamuk no bee-matan sira sei maran wainhira la halo reflorestasaun no konservasaun ba bee.

“Tuir dadus ne’ebé iha, kada tinan ita lakon ai-laran (floresta) sira kuaze éktare rihun sanulu (10.000) resin. Situasaun ne’e fó ameasa boot ba ita iha tinan 10 to’o 20 oin mai, ita-nia rai sei molik ka mamuk hotu, rai krekas, bee-matan barak sei maran, mudansa klimatika no selu-seluk tán,” dehan Ministru Pedro, ohin (22/2), iha nia intervensaun wainhira partisipa iha serimónia Steering Committe Meeting ne’ebé realiza iha Tmor Plaza, Dili, hodi ko’alia kona-ba projetu ‘Ai Ba Futuru’ ne’ebé hetan apoiu mós hosi Alemaña nia ajénsia internasionál Gesellschaft für Internationale Zusammenarbeit (GIZ).

“Situasaun ne’e akontese tanba konsiénsia hosi ita-nia komunidade sira sei menus tebes. Ita-nia komunidade maioria mak depende ba ai sunu hodi te’in, restaurante ki’ik sira, padaria sira, halo to’os muda ba mai, tesi ai ba halo uma, liuliu tesi ai ba fa’an,” Ministru Pedro akresenta.

Iha enkontru ne’e, nia mós agradese tebes ba GIZ tanba apoia ona Ministériu Agrikultura no Peska liuhosi projetu ‘Ai Ba Futuru’ hodi halo hikas reflorestasaun no konserva bee-matan sira ne’ebé atu maran ona.

Fonte: Mídia Ministério da Agricultura e Pescas (MAP)

Notísia Hotu-Hotu >