SEA Sei Tolera Distribuisaun Saku Plástiku Maibé Bandu Ona Nia Produsaun No Importasaun

Dili, 22 Fevereiru 2021 – Líder máximu Sekretaria Estadu Ambiente (SEA), Demetrio de Carvalho, informa katak SEA bandu ona  atu prodúz saku plástiku no bandu mós atu importa hosi rai-li’ur tuir lei haruka, maibé sei nafatin fó toleránsia ba distribuisaun saku plástiku tanba importasaun saku plástiku balu ró lori mai  tiha ona iha Timor-Leste molok Lei kona-ba Zero Plástiku ne’e tama iha vigór.

Demetrio akresenta ohin (22/02) iha nia knar-fatin Mandarin, Dili, katak durasaun tempu hodi tolera distribuisaun saku plástiku ne’e to’o fulan neen (6), ne’ebé hahú ona hosi 28 Janeiru liubá wainhira lei kona-ba Zero Plástiku tama iha vigór.

“Produsaun saku plástiku ne’e tuir lei ita labele importa no labele halo produsaun. Importasaun no produsaun ne’e ita bandu tiha ona. Maibé distribuisaun ne’e ita tolera to’o fulan neen oin mai hahú hosi 28 Janeiru liubá, tanba molok lei tama iha vigór, importasaun saku plastiku balu ró lori mai tiha ona iha Portu,” dehan Demetrio ba jornalista Timor News.

Iha faze implementasaun ne’e SEA uza estratejia ida bolu ‘Face Out’ ho objetivu atu kombate saku plástiku iha Timor-Leste to’o Zero, liuliu haree uluk ba produtu saku plástiku mihis iha loja sira.

Fonte: Timor News

Notísia Hotu-Hotu >