Governu Husu Ba Empreza Sira Atu Buka Rasik Alternativa Seluk Hodi Troka Saku Plástiku

Dili, 22 Fevereiru 2021 – Hafoin bandu tiha atu uza saku plástiku, Governu husu ba empreza ka loja na’in sira  atu buka rasik alternativa ka mekanizmu seluk hodi troka hikas saku plástiku atu sira bele uza ba fa’an sasán, tanba Governu sei la prodúz saku ruma atu fó ba empreza ka negosiante sira.

Sekretáriu Estadu Ambiente (SEA) Demetrio de Carvalho informa lia hirak ne’e ba jornalista Timor News, iha segunda (22/2) ne’e, iha nia knaar-fatin Mandarin, Dili, hodi responde ba negosiante Xineza balu nia preokupasaun kona-ba saku ne’ebé sira sei uza hikas hodi troka saku plástiku.

“Lei mak ko’alia. Ne’e la presiza maña malu. Lei hateten saida ne’e ha’u halo tuir lei, sira la halo tuir lei, haruka ba prosesu. Aban-bainrua Governu la fahe plástiku ba sira. Sira halo negósiu nafatin hanesan baibain. Sira tenke buka mekanizmu atu fa’an sira-nia sasán. Governu la subsidia empreza sira ho saku. Saku ne’ebé ita halo ba Sesta Bázika ne’e ba produtu seluk, la’os ba distribuisaun ba loja. Ida seluk ami halo ba programa ai-hún ida saku ida ne’e kampaña ida. Sira baibain lori sira-nia osan ba sosa saku plástiku, ohin sira tenke ba sosa fali saku seluk,” dehan Demetrio.

Kona-ba negosiante sira atu ba sosa fali saku seluk iha ne’ebé no nia tamañu oinsá, Demetrio hateten katak ida ne’e sira-nia problema.

“Ne’e sira-nia urusan,” Demetrio afirma.

Fonte: Timor News

Notísia Hotu-Hotu >