Militár Timor-Leste Prontu Atu Hetan Uluk Vasinasaun Kontra Covid-19

Dili, 23 Fevereiru 2021 – Xefe Estadu Maiór FALINTIL-Forsa Defeza Timor-Leste (F-FDTL) Koronél Calisto Santos Coli ‘Coliati’ afirma katak Militár Timor-Leste sempre prontu iha kualkér tempu atu simu uluk vasinasaun kontra Covid-19 hosi Ministériu Saúde.

Coliati hato’o afirmasaun ne’e ohin (23/2) iha Kuartél Jenerál F-FDTL Fatuhada, Dili, hodi responde ba pergunta hosi Jornalista sira relasiona ho F-FDTL nia prontidaun atu sai dahuluk simu vasinasaun kontra Covid-19.

“Ha’u hateten Militár sempre prontu iha kualkér oras no Militár prontu sai primeiru ba vasina Covid-19 ida ne’e,” Coliati afirma.

Nia mós hateten katak vasinasaun kontra Covid-19 ne’e importante tebes tanba mundu preokupa hela ho kazu mate barak, inklui Timor-Leste rasik mós iha hela preokupasaun boot kona-ba Covid-19 nia impaktu.

Fonte: Mídia F-FDTL Falintil

Notísia Hotu-Hotu >