Covid-19: Eziste Transmisaun Lokál Iha Kovalima, Na’in Haat Pozitivu

Dili, 23 Fevereiru 2021 – Ministériu Saúde ohin (23/2) rejista tán kazu pozitivu Covid-19 foun haat (4) nu’udar rezultadu hosi teste ba amostra ne’ebé foti hosi komunidade sira iha aldeia Klauhalek, suku Belulik Leten, postu-administrativu Fatumean, munisípiu Kovalima, no ida ne’e hatudu katak mosu transmisaun lokál iha Fatumean.

“Kazu haat (4) ne’e hatudu transmisaun lokál hosi posivelmente kazu importadu klandestinamente hosi populasaun ne’ebé tama-sai liuhosi fronteira,” Koordenadór Forsa Tarefa ba Prevensaun no Mitigasaun Surtu Covid-19 Rui Maria de Araújo informa liuhosi konferénsia imprensa ne’ebé hala’o ohin (23/2) iha CCD, Dili.

Nia akresenta, ekipa vijilánsia epidemiolójika ho ekipa laboratóriu nafatin buka tuir kontaktu sira ho pasiente hirak ne’e hodi halo análize ba sira-nia amostra.

Enkuantu totál amostra ne’ebé parte saúde foti hosi munisípiu refere hamutuk 851, rezultadu negativu hamutuk 847, no pozitivu mak haat (4) ne’ebé temi iha leten.

Nune’e, númeru pasiente pozitivu Covid-19 ne’ebé oras ne’e baixa hela iha Timor-Leste sa’e fali ba na’in-25, no rekuperadu foun laiha.

Fonte: Mídia Palácio das Cinzas

Notísia Hotu-Hotu >