Dili, 23 Fevereiru 2021 – Autoridade Saúde Timor-Leste liuhosi Koordenadór Forsa Tarefa ba Prevensaun no Mitigasaun Surtu Covid-19 Rui Maria de Araújo, no nu’udar ofisiál Sala Situasaun Sentru Integradu Jestaun Krize (SS-SIJK), apela ba komunidade sira atu labele sente pániku ho transmisaun Covid-19 lokál ne’ebé mosu iha postu-administrativu Fatumean, munisípiu Kovalima.

“Maske kazu foun hirak ne’e hatudu katak iha agrupamentu ida ka cluster ida, iha aldeia Klauhalek, suku Belulik Leten, Fatumean, no hatudu katak iha transmisaun lokál iha fatin ne’ebá, SS-SIJK hakarak apela ba populasaun tomak atu kalma, labele pániku,” Rui hato’o apelu ne’e liuhosi konferénsia imprensa ne’ebé realiza ohin (23/2) iha CCD, Dili.

Nia husu atu komunidade sira nafatin kumpri regra prevensaun Covid-19 ne’ebé Ministériu Saúde partilla ona.

“La presiza sai hosi uma wainhira la presiza tebes,” Rui akresenta.