Ameta Foinsa’e Ida Ho Diploma Sekundáriu Konsege Emprega Ema Na'in-125

Dili, 24 Fevereiru 2021 – Mariano da Costa Alves, koñesidu ho naran ‘Ameta’, foinsa’e ida ne’ebé hela iha lona okos hodi peneira rai-henek iha mota Komoro, Dili, durante tinan rua (2), tanba hakarak atu finaliza ninia estudu iha nível Sekundáriu, no ikus mai nia kria fali kampu traballu ba foinsa’e seluk, haktuir istória hosi Sekretaria Estadu Juventude no Desportu ne’ebé divulga ohin (24/2).

Foinsa’e ne’ebé moris iha postu-administrativu Atsabe, munisípiu Ermera, iha 04 Juñu 1992 ne’e nia inan Filomena da Silva husik mundu iha 2002, no iha tinan 2006 nia aman Fernando da Costa mós tenke husik Ameta ho nia maun-alin sira hodi tama tiha prizaun relasiona ho aktu krime balu iha momentu situasaun krize.

Maske nune’e, Ameta nafatin iha espíritu atu haka’as-an hodi hetan diploma estudu Sekundáriu, tanba ne’e nia hosi Ermera mai hela iha Dili no peneira rai-henek iha mota Komoro hodi selu rasik eskola Sekundáriu iha Finantil, no ikus mai iha tinan 2011 nia konsege remata.

Hafoin remata Sekundáriu, Ameta mós deside buka esperiénsia kona-ba lian Inglés liuhosi kursu balu, no ikus mai esperiénsia ne’e lori nia ba servisu tiha iha Austrália iha tinan 2016 liuhosi programa Seasonal Worker Program (SWP).

Fila hosi Austrália, Ameta uza osan ne’ebé nia hetan hodi kria rasik negósiu iha Atsabe no Railaku hodi prodúz no promove kafé, ne’ebé molok ne’e nia planeia ka mehi hela, no ikus mai Ameta konsege Esporta kafé tonelada besik 100 ona ba rai-li’ur to’o ohin loron.

Ameta mós harii tán ona Coffee Shop ida iha Dili, nune’e ho esforsu hirak ne’e hotu, nia konsege fó servisu ba nia maluk foinsa’e sira hamutuk na’in-125.

Fonte: Mídia Secretário Estado Juventude e Desporto (SEJD)

Notísia Hotu-Hotu >