Covid-19: Pozitivu Foun Rua Tán Iha Kovalima, Rekuperadu Neen

Dili, 24 Fevereiru 2021 – Sala Situasaun Sentru Integradu Jestaun Krize (SS-SIJK) liuhosi nia ofisiál Rui Maria de Araújo, informa ohin (24/2) iha CCD, Dili, katak Ministériu Saúde deteta tán kazu pozitivu Covid-19 rua  (2) nafatin hosi aldeia Belulik Leten, postu-administrativu Fatumean, munisípiu Kovalima, no pasiente rekuperadu foun hamutuk na’in neen (6).

Kona-ba pasiente foun na’in rua (2) ne’e, Rui Araújo ne’ebé nu’udar mós Koordenadór Forsa-Tarefa ba Prevensaun no Mitigasaun Surtu Covid-19 dehan “Sira na'in rua (2) membru familia hosi kazu foun ne’ebé anunsia tiha ona horisehik (23/2)”.

Nia informa mós katak ekipa ambulánsia ohin evakua ona pasiente na’in haat (4) ne’ebé deteta iha Fatumean horisehik no na’in rua (2) ohin ne’e hodi ba izola iha Vera-krúz, Dili, no kazu hirak ne’e hatudu katak iha duni transmisaun Covid-19 lokál iha Kovalima.

Nune’e, pasiente pozitivu Covid-19 ne’ebé oras ne’e baixa hela iha Timor-Leste hamutuk na’in ruanulu resin ida (21).

Fonte: Mídia Palácio das Cinzas

Notísia Hotu-Hotu >