Polísia Militár Halo Ezersísiu Marsa Forsada Ho Distánsia Kilómetru 8

Dili, 25 Fevereiru 2021 – Falintil-Forsa Defeza Timor-Leste (F-FDTL) nia Unidade Polísia Militár (PM) halo ohin (25/2) halo ezersísiu Marsa Forsada (MARFOR) ho distánsia kilómetru ualu (8), hahú hosi Kuartél Unidade PM Kintál-Boot to’o Balibar, Dili, no fila hikas ba Kuartél Unidade PM.

Komandante Unidade PM Majór Infantária Abel da Costa Xavier ‘Niki’ hateten, ezersísiu marsa ne’e ho objetivu atu kapasita di’ak liután membru sira-nia fíziku wainhira kumpre misaun.

“Objetivu hosi ezersísiu ida ne’e mak atu aumenta ami-nia fíziku, tanba tropa ne’e tenke halo ezersísiu hela de’it. Ida agora daudauk ami hala’o ne’e ezersísiu MARFOR ida ne’e faz parte iha instrusaun fíziku ninian, hodi bele amenta Militár nia ezisténsia wainhira ami ba kumpre misaun ruma iha fronteira ka iha munisípiu ami prontu ona,” dehan Niki, ohin (25/2), iha Kuartél Unidade PM.

Niki mós husu nafatin ba membru sira ne’ebé kumpre misaun iha ne’ebé de’it, atu kontinua kumpre regra prevensaun Covid-19 tuir rekomendasaun hosi Ministériu Saúde.

Fonte: Mídia F-FDTL Falintil

Notísia Hotu-Hotu >