Transmisaun Lokál Covid-19: Kazu Ida Tán Iha Kovalima, Rekuperadu Mós Ida

Dili, 25 Fevereiru 2021 – Koordenadór Forsa Tarefa ba Prevensaun no Mitigasaun Surtu Covid-19, Rui Maria de Araújo, informa ohin (25/2) iha CCD, Dili, katak Ministériu Saúde rejista tán kazu pozitivu Covid-19 ida (1) nafatin hosi aldeia Klauhalek, suku Belulik Leten, postu-administrativu Fatumean, munisípiu Kovalima, no iha mós pasiente ida iha RAEOA mak rekuperadu ona.

Kona-ba kazu pozitivu foun ida (1) ne’e, Rui eskplika katak Ministériu Saúde deteta kazu refere hosi amostra 40 ne’ebé foin foti tán horisehik (24/2) iha aldeia Klauhalek.

“Hosi teste PCR ne’ebé halo, hetan tán pozitivu ida, mane ho idade 69, ninia kaben konfirmadu nu’udar kazu foun iha loron rua liubá,” Rui informa.

Nune’e pasiente Covid-19 ne’ebé oras ne’e baixa hela iha Timor-Leste hamutuk na’in-21.

Fonte: Mídia Palácio das Cinzas

Notísia Hotu-Hotu >