Udan Boot Rezulta Korente Hosi Mota Rua Ameasa Komunidade Iha Alas

Manufahi, 01 Marsu 2021 – Impaktu hosi udan boot rezulta korente mota Lakló no mota Wee ain-foun aumenta boot hodi fó ameasa ba komunidade uma-kain hamutuk 43 ho totál populasaun 192 iha bairu Wekaka-oan, aldeia Lakuan, suku Dotik, postu-administrativu Alas, Manufahi, haktuir Administradór postu-administrativu Alas Leopoldo Barreto ohin (01/3) via telefone.

Nia dehan, udan boot ne’ebé akontese hahú hosi 16 Fevereiru ka semana kotuk liu to’o agora rezulta volume korente mota Lakló naresin, aumenta tán ho korente mota wee ain-foun nian, no fó ameasa tebes ba populasaun sira-nia hela-fatin, to’os, natar inklui ai-horis seluk tán.

Volume hosi korente mota rua ne’e halo mós komunidade sira-nia movimentu paradu totál.

Relasiona ho problema refere, Administradór Leopoldo hateten, nia informa ona ba Administradór munisípiu Manufahi hodi kanaliza hikas ba parte Ministériu Obras Públika atu resolve hodi salva komunidade sira.

Fonte: Diáriu "Roman ba Sosiedade" Manufahi

Notísia Hotu-Hotu >