SEKOMS Husu Timoroan Fó Hanoin Ba Malu Atu Kumpri Regra Prevensaun Covid-19 Ho Konsiénsia

Dili, 01 Marsu 2021 – Relasiona ho transmisaun lokál Covid-19 ne’ebé mosu ona iha Timor-Leste iha Fevereiru 2021 nia laran, Sekretáriu Estadu Komunikasaun Sosiál (SEKOMS) Merício dos Reis Akara liuhosi komunikadu imprensa ida ne’ebé divulga ohin (01/3), husu ba sidadaun timoroan hotu-hotu atu tenke fó hanoin ba malu hodi kumpri regra prevensaun Covid-19 ne’ebé Governu sei nafatin implementa iha estensaun Estadu Emerjénsia (EE) ba dala-11.

“Nafatin tulun malu no fó hatene ba malu atu hotu-hotu tenke kumpre regra (Prevensaun Covid-19) sira ne’e,” dehan SEKOMS iha komunikadu imprensa ne’e.

Governu sei implementa mós lockdown ba munisípiu Kovalima, Bobonaru no Oekusi iha EE ba dala-11 ne’e, tanba ne’e SEKOMS mós apela ba komunidade sira iha munisípiu tolu ne’e atu ida-idak uza konsiénsia hodi labele halo movimentu ilegál arbiru, tenke aplika nafatin medida prevensaun Covid-19 ne’ebé Ministériu Saúde partilla ona, no ida-idak hela iha uma de’it wainhira laiha nesesidade ruma atu sai ba fatin públiku.

Ikus liu, komunidade sira tenke informa ba autoridade kompetente wainhira haree ema foun ruma tama iha Timor-Leste.

Fonte: Mídia Secretário de Estado Para a Comunicação Social (SECOMS)

Notísia Hotu-Hotu >