EE Da-11: Governu Suspende De'it Atividade Eskolár Iha Kovalima

Dili, 02 Marsu 2021 – Konsellu Ministru realiza enkontru ohin (02/3) iha Palásiu Governu, Dili, no deside la suspende atividade eskolár ka prosesu ensinu aprendizajen rejime prezensiál iha teritóriu Timor-Leste iha Estadu Emerjénsia (EE) ba dala-11 ne’e, maibé prevé hela posibilidade atu suspende temporária karik departamentu Governamentál responsável ba saúde públika rekomenda ho efeitu atu hamenus risku transmisaun Covid-19.

Enkuantu ba munisípiu Kovalima, haktuir informasaun ne'ebé Ministru Prezidénsia Konsellu Ministru Fidelis Magalhães divulga ohin katak, Governu "nafatin suspende atividade eskolár", ida ne'e tanba transmisaun lokál Covid-19 ne’ebé oras ne’e deteta ona iha ne’ebá.

Iha enkontru ne’e, Konsellu Ministru mós aprova ona projetu Dekretu Governu nian ne’ebé aprezenta hosi Primeiru-Ministru Taur Matan Ruak, kona-ba medida ezekusaun Estadu Emerjénsia ba dala-11 iha Timor-Leste, ne’ebé jeralmente mantéin medida sira ne’ebé molok ne’e aprova ona, no kona-ba suspensaun eskola iha teritóriu laran tomak ne’e depende ba rekomendasaun hosi parte Saúde.

Fonte: Mídia Gabinete do Primeiro Ministro (GPM)

Notísia Hotu-Hotu >