Korea Súl Sei Harii Sentru Treinamentu TAEKWONDO Iha Timor-Leste

Dili, 04 Marsu 2021 – Korea Súl liuhosi nia Embaixada iha Timor-Leste koopera ho Governu atu hodi konstrui ka harii Sentru Treinamentu arte-marsiál TAEKWONDO iha Timor-Leste ne’ebé nia prosesu konstrusaun sei hahú iha fulan ida ne’e (Marsu 2021) nia laran ho durasaun determinada to’o fulan hitu (7), nune’e sei remata konstrusaun iha Outubru 2021.

Tanba ne’e, Embaixadór Korea Súl iha Timor-Leste, Kim Jeongho, ohin (04/3), hasoru malu ho Ministru Justisa Manuel Cárceres da Costa iha nia knaar-fatin Ministériu Justisa, Dili, hodi husu ba Ministru Justisa atu garante rai ka terenu ba Embaixada Korea Súl hodi bele hahú ona konstrusaun Sentru Treinamentu refere ne’ebé sei gasta orsamentu ho montante $170.000.

Enkuantu rai ne’ebé atu uza hodi harii Sentru Treinamentu TAEKWONDO ne’e mak iha Tibar, Dili, bazeia ba rekomendasaun hosi Diretór Jerál Rai no Propriedade Ministériu Justisa nian.

Iha sorumutuk, parte rua ko’alia mós kona-ba preparasaun ekipamentu treinu nian hanesan protetór eletróniku ba desportu TAEKWONDO ba ekipa Nasionál Timor-Leste.

Fonte: Mídia Ministério da Justiça (MJ)

Notísia Hotu-Hotu >