Governu Sei Aplika Multa Osan Ba Ema Ne’ebé Hakerek Arte-Marsiál Nia Naran Iha Fatin Públiku

Manufahi, 04 Marsu 2021 – Governu sei aplika sansaun multa osan ba ema ne’ebé hakerek arbiru arte-marsiál nia naran iha parede ne’ebé eziste iha fatin públiku sira, no iha meza no kadeira sira ne’ebé estabelese iha fatin públiku sira, tuir Lei ne’ebé Governu liuhosi Sekretaria Estadu Juventude no Desportu (SEJD) ho Komisaun Reguladora Arte-Marsiál (KRAM) servisu hamutuk ho Jurídiku Sosiál (JU,S) prodúz hela.

Prezidente KRAM Octaviano da Conceição hato’o informasaun refere wainhira KRAM halo konsultasaun públiku kona-ba lei arte-marsiál ho autoridade sira iha kinta (04/3) ne’e iha Administrasaun munisípiu Manufahi.

Maske foin tama iha faze konsultasaun públiku, Prezidente KRAM esplika ona katak Lei ne’ebé sira prodúz mak atu aplika sansaun multa osan ba sidadaun ne’ebé hakerek arte-marsiál iha fatin públiku, no mós aplika sansaun multa osan ba membru arte-marsiál ne’ebé ilegalmente sa’e sintu iha nasaun viziñu, hatais uniforme arte-marsiál nian iha fatin públiku no asaltu malu.

Nia akresenta, wainhira aplika ona multa no la kumpre nafatin lei hirak ne’e entaun sei hetan kastigu.

Konsultasaun púbiku ne’e hetan partisipasaun hosi Administradór Manufahi Arantes Sarmento, Komandante Komandu Polísia Manufahi, Superintendente Polísia Joni Viana das Regras, Responsável no Treinadór organizasaun arte-marsiál, estudante, lideransa komunitária, sosiedade sivíl, Administradór postu-administrativu sira no autoridade lokál sira seluk tán.

Fonte: Diáriu "Roman ba Sosiedade" Manufahi

Notísia Hotu-Hotu >