Covid-19: Rejista Tán Kazu Foun Neen, Ida Iha Baukau No Lima Iha Kovalima

Dili, 05 Marsu 2021 – Koordenadór Forsa Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo informa ohin (05/3) iha CCD, Dili, katak ohin parte saúde rejista tán kazu foun neen (6), no hosi kazu neen ne’e lima (5) deteta iha suku Belulik-Leten, postu-adminsitrativu Fatumean, munisípiu Kovalima no ida (1) deteta iha munisípiu Baukau.

“Hosi cluster Klauhalek (Kovalima), deteta tán kazu konfirmadu na’in lima (5), na’in tolu (3) iha aldeia Baleo-ki’ik no na’in rua (2) iha aldeia Mane-ki’ik. Aldeia rua ne’e viziñu ho aldeia Klauhalek no pertense hotu ba suku Belulik-Leten […] Deteta kazu konfirmadu foun ida iha munisípiu Baukau. Kazu ida iha Baukau ne’e halo viajen hosi Dili ba Baukau iha 01 Marsu ho bis naran MABENIFA, xapa matríkula 36-806 TL [..] Iha 02 Marsu viziñu sira informa ekipa konjunta saúde Baukau katak ema ne’e kleur ona la hela iha Baukau, posivelmente halo viajen ba fatin kontaminadu ruma no husu atu halo teste. Ekipa konjunta foti amostra […] rezultadu hatudu pozitivu,” Rui informa.

Maibé kazu ida iha Baukau ne’e, Rui haktuir, ho kondisaun iha hela faze rekuperasaun tanba teste fali iha 4 Marsu hodi konfirma tán, no hatudu rezultadu negativu fali.

Iha mós pasiente rekuperadu na’in haat (4) ne’ebé Ministériu Saúde rejista ohin, nune’e, pasiente ne’ebé oras ne’e baixa hela iha izolamentu hamutuk na’in-25.

Fonte: Mídia Palácio das Cinzas

Notísia Hotu-Hotu >