Reitór UNTL Ho Eskola São Francisco Hatulia Kuda Ai-Oan 300 Iha Hatulia

Ermera, 06 Marsu 2021 – Reitór Universidade Nasionál Timor Lorosa’e (UNTL) João Soares Martins, ho Diretór Ensinu Sekundáriu São Francisco Hatulia, Padre Natalino da Costa Soares, hamutuk ho estudante hosi Ensinu Báziku to’o Ensinu Sekundáriu São Francisco Hatulia, iha sábadu (06/3) ne’e, halo reflorestasaun hodi kuda ai-oan hamutuk atus tolu (300) iha resintu areadór Igreja Parókia São Francisco Hatulia, Ermera.

Iha atividade ne’e, Reitór UNTL enkoraja estudante sira atu kontribui ba reflorestasaun tanba nia benefísiu importante tebes ba protesaun ambiente.

“Imi estudante sira keta baruk atu kuda ai-oan iha ida-idak nia uma, komunidade no sosiedade, tanba bele kontribui ba hariku oxijéniu, habokur rai, haforte estrutura rai, no hamatak ambiente,” dehan Reitór UNTL.

Enkuantu Padre Natalino hateten, atividade reflorestasaun ne’e ho objetivu atu tulun proteje ambiente, tanba timoroan barak mak hatoman-an ho tesi no sunu ai, maibé susar atu kuda fila-fali.

Padre Natalino mós agredese no orgullu ho Reitór UNTL ne’ebé nu’udar mós Fundadór ba Ensinu Sekundáriu São Francisco, tanba marka ona prezensa iha ne’ebá hodi hala’o atividade ne’e no diskute mós asuntu balu ho autoridade eskola refere nian, inklui hasoru estudante sira.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >