Nasaun 8 Iha Europa Suspende Aplikasaun Vasina AstraZeneca Tanba Mosu Efeitu Perigozu Hafoin Injekta

Europa, 12 Marsu 2021 – To’o iha loron sexta (12/3) ne’e nasaun ualu (8) ona iha Eupora mak hapara provizoriamente ka suspende vasinasaun kontra Covid-19 ho vasina ne’ebé prodúz hosi empreza farmaséutika AstraZeneca, tanba mosu efeitu kolaterál ne’ebé bolu konjelamentu raan, hafoin pasiente simu tiha vasinasaun ho vasina AstraZeneca, haktuir CNN ohin (12/3).

Ajénsia Medikamentu Europeia (sigla inglés EMA) haktuir, efeitu kolaterál ne’e akontese ba ema hamutuk na’in-22 hosi populasaun liu millaun 3 ne’ebé simu ona vasinasaun ho AstraZeneca iha Europa.

Dinamarka nu’udar nasaun dahuluk ne’ebé deklara suspensaun ba utilizasaun vasina AstraZeneca durante loron 14, tanba iha feto ida ho idade 60 mate kauza hosi konjelamentu raan hafoin nia simu tiha vasinasaun ho vasina AstraZeneca.

Ministru Saúde Dinamarka Magnus Heunicke haktuir, seidauk posivel atu konklui kona-ba kazu hirak ne’e iha relasaun ho vasina AstraZeneca ka lae, maibé suspensaun ne’e atu prevene hodi hein informasaun loloos hafoin investigasaun.

Nasaun seluk iha Europa hanesan Áustria, Noruega, Islándia, Estónia, Lituánia, Luxemburgu no Letónia mós foti asaun ne’ebé hanesan ho Dinamarka, katak suspende mós aplikasaun vasina AstraZeneca.

Enkuantu Primeiru-Ministru Tailándia Prayut Chan-o-cha, ohin (12/3), kansela mós planu atu simu vasinasaun kontra Covid-19 ho vasina AstraZeneca, tanba haree ba kazu efeitu kolaterál ne’ebé mosu iha Europa.

Maibé, Austrália no Méxiko enfatiza atu kontinua uza vasina AstraZeneca kontra Covid-19, tanba seidauk iha evidénsia katak kazu konjelamentu raan ne’e impaktu hosi vasina AstraZeneca.

Fonte: CNN

Notísia Hotu-Hotu >